«Астана» баскетбол командасы
плей-офф ойындарының алғашқы сынынан аса алмады. Бірінші кезеңде Мәскеудің
«ЦСКА» клубымен жолыққан Рамунас Бутаутастың шәкірттері қатарынан үш ойында
ұтылды. Сырт алаңда өткен екі кездесуде ірі есеппен есе жіберген қазақстандық
ұжым өз алаңында өткен ойында да қонақтарға қарсы тұра алмады. Бірінші кезең
басынан тура соққылармен ерекшеленіп, қорғаныста қателікке бой алдырмаған
армияшылар үлкен үзіліске 57-44 есебімен жетті. Ойынның екінші бөлігі «ЦСКА» командасының басымдығымен
өтті. Қонақтар сапында мергендігімен көзге түскен Андрей Воронцевич команда
жеңісіне сүбелі үлес қосты. Қалған уақытта қанша тырысқанымен, «Астана» баскетболшылары қарсыластың қарқынына төтеп бере алмады.
Қорытынды есеп - 111-75 «ЦСКА» клубының пайдасына.
Испания астанасы Мадрид қаласында теннистен "Мастерс"
турнирі жалғасуда. Дәрежелі жарыста сынға түсіп жатқан алаң иесі Рафаэль Надаль
ширек финалға жолдама алды. Үшінші айналымда Испания спортшысы Италия
теннисшісі Симоне Болелимен кортқа шықты.
Кездесу басынан ойын тізгінін
қолына алған Надаль бірінші сетте 6-2 есебімен басым түсті. Үзілістен кейінде
алған бетінен қайтпаған Пиреней Түбегінің өкілі ұпай санын арттырды. Өз
кезегінде жиі қателесіп, қарсыласының қарқынына төтеп бере алмаған Симоне
Болели жеңілісін мойындады. Қорытынды
есеп - 6-2,6-2.
Самат ҚАНАҒАТОВ