Футболдан Бразилия құрамасы Америка кубогынан шығып қалды. Ширек финалда Парагвай командасымен сынға түскен Дунганың шәкірттері негізгі уақытта тең түскеніне қарамастан пенальти сериясында 4-3 есебімен ұтылды. Дегенмен, бұл ойындағы алғашқы голды пентакампьондар сапында Робинто соқты. Үзілістен кейін кезекті допқа талас кезінде қорғаушы Тьяго Силва өз айып алаңында допты қолмен тоқтатты. Бұл сәтті көзден таса жібермеген бас қазы пенальти тағайындады. 11 метрлікті сәтті орындаған Дерлис Гонсалес мүлт кетпеді. Негізгі уақытпен екстра таймда жеңімпаз анықталмағандықтан пенальти сериясы тағайындалды. Бұл лотореяда жолы болған Парагвай құрамасы жартылай финалға жолдама алды. Бразилиялықтар сапында Рибейро мен Коста қателікке бой алдырды. Ал Дерлис Гонсалес болса, командасына жеңіс сыйлады. Енді Парагвай командасы-Аргентина құрамасымен ақтық сын жолдамасын сарапқа салады.
Ұлыбританияның Истбурн қаласында теннистен халықаралық турнир аяқталды. Іріктеу сынынан сүрінбей өткен Швейцария спортшысы Белинда Бенчич турнир жеңімпазы атанды. Ақтық сында 18-жасар теннисші Польша Спортшысы Агнешка Радванскамен кортқа шықты. Бірінші сетте 6-4 есебімен басым түскен Бенчич үзілістен кейін босаңсып, ойын тізгінін қарсыласына беріп алды. Мұндай мүмкіндікті пайдаланған Польша теннисшісі таразы басын теңестірді. Дегенмен, шешуші сетте тез жиналған Белинда Бенчич қарсыласының бас көтеруіне мүмкіндік бермеді. Өз кезегінде жиі қателесіп, шарасыздық танытқан Агнешка Радванска 6-0 есебімен ойсырай ұтылды. Бұл 18-жасар швейцария спортшысының спорттық карьерасындағы алғашқы ірі жеңісі.
Самат ҚАНАҒАТОВ