«Ұлы дала Жаңа жылы». «Астана» телеарнасы өз көрермендеріне жаңа жылдық ерекше тарту әзірлеу үстінде. Сүйікті арналарыныңыз 31-желтоқсан күні әдеттегіден бөлек туынды ұсынбақ! Жаңа жылдық түсірілімде ән де, әзіл де көп болады. 10 сағаттық жаңа жоба Шымкент қаласында түсірілетінін айта кетейін. Неліктен бұл шаһар таңдалды? Өңірлік тілшіміз Айзада Төребекқызы баяндасын.
Шымкенттегі жеңіл атлетика манежі бірнеше күнге үлкен концерт залына айналды. Жарқылдаған жарықтар, құлаққа жағымды әуендер. Мұның бәрі пандемия кезіндегі қым-қуыт тіршілікті бір сәтке ұмыттыратыны анық. Елге танымал эстрада жұлдыздарының барлығы дерлік осында.
Өнер адамдарының сахнаны және көрерменді қатты сағынғанын аңғару қиын емес. Әрбірі Жаңа жылдан үлкен үміт күтеді.
Роза РЫМБАЕВА, ҚАЗАҚСТАН РЕСПУБЛИКАСЫНЫҢ ХАЛЫҚ ӘРТІСІ:
Ең бірінші мынау карантиніміз, коронавирусымыз жойылып, бейбіт өмірге көшейік. Сіздерменен үлкен сахналарда кездесейік. Әндеріміздің барлығы тек қана бақытты, қуанышты елімізді, Отанымызды жырлайтын әндер болсын. Сіздермен кездесуді сағындық. Сондықтан Жаңа жылда осындай қуаныштар көп болады деп өзім сенемін.
Отандық әншілер ғана емес түркі әлеміне танымал өнер жұлдыздары да "Астана" телеарнасына ат басын тіреді. Солардың бірі түріктің танымал әншісі Мұстафа Сандал.
Бұл өте ауқымды жоба. Отандық телевидениеде бұрын-соңды кездеспеген - жоба! Жаңа жылдық шоу 1-2 сағат емес 10 сағат бойы жүреді. Эфир "Астана" телеарнасында желтоқсанның 31 күні кешкі 16:00-де басталады. Көңілді кеш елдегі үшінші мегополис - Шымшаһарда түсірілуде.
Құрманбек ЖҰМАҒАЛИ, «AСТАНА» ТЕЛЕАРНАСЫНЫҢ БАС ДИРЕКТОРЫ:
Неге Шымкент қаласы?! Шымкент қаласы бұл- енді жаңадан құрылған республикалық маңызы бар үлкен қала, иә. Мұндай жаңадан құрылған облыстарда қаланы қолдау керек деп ойлаймын. Енді құдай қаласа келесі жылыда алда талай-талай жобалар болар, дегенменде биылғы жобаның басты ерекшелігі бүкіл қазақ эстрадасының әншілері ғана емес, әртістері, және де бұрын соңды қазақ телевизиясында болмаған бұндай үлкен жоба, иә.
Жаңа жылдық түсірілім бірнеше локация бойынша жүруде. Мың бұралған бишілер, жезтаңдай әншілер, естен кетпес әзілдер мен спорт саңлақтары. Жоба - жүзден аса өнер майталмандарының басын қоспақ.
Жан МҰҚАНОВ, ЖОБАНЫҢ БАС ПРОДЮСЕРІ:
Еуровидение форматы тәрізді...Әр өңір өз әртісін күтеді. Ал, әншілер өз өңірін кішігірім таныстырып өтеді. Әрине, биылғы жыл ешкімге оңай болған жоқ. Сондықтан ескі жылды барынша жарқын көңілмен шығарып салсақ дейміз. Өткенді ұмытып, жаңа 2021 жылды жаңа көңіл-күймен, жаңа күшпен қарсы алайық!
Жоба ауқымды әрі көңілді. Кешті қыздыра түсу үшін жүздеген маман тәулік бойы еңбек етуде. "Шоу - Астана телеарнасы көрермендерінің көңілінен шығады", деген сенім бар.
А. Төребекқызы