Жамбыл облысында жарылыс болған әскери бөлімге ең жақын орналасқан Қайнар ауылының тұрғындары қауіпсіз жерге көшірілді.
Өйткені, қауіп әлі сейілмеген. Қайта-қайта жарылыстан әбден қорқып қалған жұрт елдімекенді мүлдем алысқа көшіруді талап етіп отыр. Бұған жергілікті билік өкілдері не дейді? Өңірдегі тілшіміз Берік Жұмабай тарқатады.
Жексенбідегі жарылыстан кейін міне бүгін Қайнар ауылы мен әскери бөлімге керер жолдың барлығы жабылды. Себебі, қауіптің беті қайтпаған, қайта жарылуы мүмкін дейді мамандар. Осы себепті алдыңғы жарылыстан зардап шеккен үйлерді қалпына келтіріп жатқан құрылысшылар мен ауыл тұрғындары қауіпсіз аймаққа көшірілді. Олар Тараз қаласы мен жақын маңдағы туыстарының үйіне жіберілген.
46 күннен кейін қайталанған дүмпуден дүйім жұрт қатты қорқып қалған. Сондықтан елдімекенді әскери бөлімнен алысқа көшірсін дейді олар.
БЛИЦ:
- Мен азанда туалетке шықтым да қайтып палаткаға кірейін деп жатыр едім бір дауыс естілді, балон жарылған екен деп ойладым. Сөйтсем екіншісінде кәдімгідей атылып, жанды ғой. Біріншісі жай болды. Кейін мынандай болды.
- Өткендегіден кейін жүрегіміз басылды. Енді-енді үйіміз бітіп жатыр, енді кіреміз деп отқанда мынау болып жатыр ғой қайтадан. Қайталанатын болса көшірсін басқа жаққа. Ақыры өздері не сенімсізғой көшірсін басқа жаққа тұрмаймыз біз.
Ал ауылды көшіру мәселесін әкімдіктегілер әзір қарап жатқан жоқпыз дейді.
Талғат МАМАЕВ, ЖАМБЫЛ ОБЛЫСЫ ӘКІМІНІҢ ОРЫНБАСАРЫ:
Халықпен сөйлесіп шықтық. Қазіргі таңда көшіру мәселесін көтеріп жатқан жоқпыз. Түсіндірдік барлығын. Сондықтан егерде қауіп болатын болса біз тиісті шешім қабылдаймыз.
Алдындағы жарылыстан қираған176 нысан әлі толық қалыпқа келтірілмеген. Құрылыс жұмыстары уақытша тоқтап тұр.
Қайрат ИСМАИЛ, БАЙЗАҚ АУДАНЫ ӘКІМІНІҢ ОРЫНБАСАРЫ:
Құрылысшылар да 105 адам олар да бүгін жұмысқа жіберілмей жалпы демалысқа жіберілді. Қауіпсіз аймақта. 19 үйдің бәрінің шатыры жабылды. 6 үйдің ішкі жылу жүйелері қайта қалпына келтірілді. Енді осы аптаның соңына дейін 5 үй баспанасына кіреді деген жоспарымыз бар.
Жарылыстың себебі әзірге белгісіз. Бірақ екі күн қатарынан жауған жаңбырдың әсері болуы мүмкін деген болжам бар.
Дина МУХАРИНОВА, ТАРАЗ ГАРНИЗОНЫ БАСПАСӨЗ ҚЫЗМЕТІНІҢ БАСТЫҒЫ:
Жарылыс әскери бөлімнің ішіндегі жарылғыш заттарды жинайтын орында болды. Қолданыстағы қарулар емес жарылған, алдынғы жарылыстан жиналған снарядтардың қалдықтары. Себебі әзірге белгісіз. Қазір қауіп қайталанбас үшін «Скайларк» апараты, яғни дрон ұшырдық. Бұл жарылыс кезінде әскерилер болған жоқ. Ауыл адамдары да аман.
Тұрғындарға қауіп-қатер төнбес үшін жарылғыш заттарды сол жерде немесе елдімекендерден алшақ жерге апарып, көзін жою мәселесін штаб мүшелері қазір қарастырып жатыр.
Б. Жұмабайұлы