Қарағандыда басын темір тор арасына кіргізіп, қайта шығара алмаған үш жасар бала құтқарылды, - деп хабарлайды Tengrinews.kz.
Қарағандылық құтқарушылар үш жасар баланы темір тор құрсауынан шығаруға көмектескен.
Оқиға қаланың оңтүстік-шығысындағы Кеншілер даңғылы бойындағы аулалардың бірінде болған. Облыстық Төтенше жағдайлар департаментінің кезекші пультіне оқиға куәгерлерінен баланың сырғанақ қоршауының темір торлары арасына қысылып қалғаны туралы хабарлама түскен. Оқиға орнына құтқарушылар барған. Арнайы құрал көмегімен олар тор арасын ашып, баланың шығуына көмектескен.
"Қызметкерлер кәсіпқойлығы мен тиімділігін көрсетті, баланың басын арнайы құрал көмегімен ойын құрылымынан босатып алды", - деді Қарағанды облысы Төтенше жағдайлар департаментінің баспасөз қызметі өкілдері.