Алматылық бойжеткенді кездесуге шақырған азамат оған жауыздық көрсетіп, өлтірген. Туыстарының айтуынша, күдікті қылмысын жасыру үшін қыздың ұялы телефонын алып қашып кетіпті. Енді істің жеңіл жабылып, жауыз жазасыз қала ма деп алаңдап отыр. Қайғыдан қан жұтқан марқұмның жақындарымен Әйкерім Пернебек тілдесті.
31 жастағы Айнагүл Алматы қаласында мансап құрып, жақындарына жәрдемдесіп жүрген бір үйдің кенже қызы еді. Кездесуге шақырған жігітті бұрын 1 рет ғана көрген. Туыстары Айнагүлдің кездесудің алдында қалдырған аудио жазбасымен бөлісті. Онда ол 1 сағат отырып, үйге қайтамын деп хабарлама қалдырған. Алайда, бұл жас қыздың соңғы хаты болды.
Кафеде ер азамат дөрекілік танытып, бойжеткеннің еркінен тыс әрекеттерге барған көрінеді. Артынша жас қызды күшпен сүйрелеп далаға алып шыққанын бірнеше куәгер көрген. Айнагүл өз телефонынан полиция шақырған. Алайда шамамен 20 минуттан соң келген тәртіп сақшылары бойжеткеннің мәйітін тапты.
Бақыт ДҮНГЕНОВА, МАРҚҰМНЫҢ ӘПКЕСІ:
Камерадан көрсетіп тұр, кеудесінен итерген сіңілімді. Сіңілім құлаған, содан бұл жігіт қашып кетеді. Қашып кетеді де бір 20 минуттан кейін ба қайтып келеді де, телефонын тастап кетеді. Жаңағы телефонын алып кеткен ғой, біз ойлаймыз неге ол телефонды алып кетті. Өзінің ана доказательствосын өшіру үшін алып кетті ма дейміз. Әйтпесе келіп скорый шақыруға болар еді.
Оқиғадан кейін күдіктінің жақындары марқұмның ата-анасының үйіне барып кешірім сұрамақ болған.
Бақыт ДҮНГЕНОВА, МАРҚҰМНЫҢ ӘПКЕСІ:
Кешірім сұраудың орнына кеудесін керіп мы сюда пришли не оправдываться деп тұр. Жаназасын шығарып біткеннен кейін кешкісін келді, бір конверт ақша алып келді, ол ақша бізге керек емес, қанға балынған ақша біздің сіңілімізді қайтарып алып келмейді. Сол үшін сіздерге бір өтініш жігіт өз жазасын алсын, қолымен істегенін мойнымен көтерсін
Бұл жағдай Полиция департаментінде тіркеліп, тергеу әрекеттері жүріп жатыр.
Салтанат ӘЗІРБЕК, АЛМАТЫ ҚАЛАЛЫҚ ПОЛИЦИЯ ДЕПАРТАМЕНТІНІҢ РЕСМИ ӨКІЛІ:
Аталған дерек бойынша Түрксіб аудандық полиция Басқармасымен ҚР ҚК-нің 99-бабы 1-бөлігі бойынша сотқа дейінгі тергеу амалдары жүргізіліп жатқанын хабарлайды.
Осы қылмысты жасады деген күдікті 1991 жылы туған Т.есімді азамат ұсталды және қамауға алынды. Қылмыстық істің шеңберінде тергеу әрекеттері тергеудің объективтілігі, жан-жақтылығы және толықтығы қағидаттарын қатаң сақтай отырып жүзеге асырылады. Сараптамалар тағайындалды.
Марқұм Айнагүлді жақындары өте еңбекқор адал жан, білікті маман, отбасының сүйікті қызы еді дейді. Қайғыдан қан жұтқан оның туыстары күдіктінің қатаң жазалануын сұрайды.